कोरोनामुळे सोने आणि चांदी स्वस्त झाली आहे. मागील दहा दिवसात सराफा बाजारात सोनं प्रतितोळा सुमारे पाच हजारांनी स्वस्त होऊन ४० हजारांच्या खाली पोहोचलं. गुढीपाडवा आणि लग्नसराईच्या तोंडावर सोन्याच्या दरात घसरण झाल्याने ग्राहकांना दिलासा मिळाला आहे.
सोन्याच्या दरात १९४९ रुपयांनी घसरण होऊन प्रति दहा ग्रॅम ३९ हजार ६६१ रुपये झाला आहे. तर चांदीच्या दरात प्रतिकिलो ६४४५ रुपयांनी घसरला आहे. चांदी प्रतिकिलो ४० हजार ३०४ रुपये झाली आहे. राजधानी दिल्लीत सोमवारी सोन्याच्या दरात 455 रुपयांनी वाढ होऊन 41,610 रुपये प्रतितोळा झालं होतं. तर चांदी मात्र 1,283 रुपयांनी घसरुन 40 हजार 304 रुपये किलोंवर पोहोचली होती.
कोरोना व्हायरसचा परिणाम सराफा बाजारावरही पाहायला मिळत आहे. कोरोनामुळे आंतरराष्ट्रीय बाजारात रुपया कमकुवत झाल्याने सोन्याच्या दरात मोठी घसरण झाली आहे. मात्र तरीही ग्राहकांनी बाजारात पाठ फिरवल्याचंच चित्र आहे.
