वर्धा जिल्ह्यातील हिंगणघाट जळीत कांड प्रकरणाने संपूर्ण महाराष्ट्र हादरला होता. या घटनेत प्राध्यापक युवतीवर पेट्रोल टाकून जाळण्यात आले होते. या घटनेत तिचा मृत्यू झाला होता. याप्रकरणी घटनेपासून 26 व्या दिवशी 426 पानांचे दोषारोपपत्र दाखल करण्यात आले आहे.
हिंगणघाट जळीत कांडातील आरोपीविरोधात पोलिसांनी कोर्टात आरोपपत्र दाखल केलंय. हिंगणघाट इथं कॉलेजला जात असलेल्या प्राध्यापक युवतीवर पेट्रोल टाकून जाळण्यात आलं होतं. नागपूरच्या रुग्णालयात तिचा उपचारादरम्यान मृत्यु झाला. याप्रकरणी पोलिसांनी आरोपी विक्की उर्फ विकेश नगराळे याला अटक केली. त्यानंतर प्रकरणाचा सर्व बाजुंनी तपास करत पुरावे गोळा करण्यात आले. शुक्रवारी घटनेपासून 26 व्या दिवशी 426 पानांचं दोषारोपपत्र दाखल करण्यात आलंय.
एकतर्फी प्रेमातून जिवंत जाळण्याचा प्रयत्न झाल्यानंतर हिंगणघाटच्या निर्भयानं 7 दिवस मृत्यूशी कडवी झुंज दिली. मात्र, 10 फेब्रुवारीला पहाटे उपचारादरम्यान नागपूरच्या ऑरेंज सिटी रुग्णालयात तिची प्राणज्योत मालवली. त्यानंतर पोलिसांनी या प्रकरणात 302 या कलमाची वाढ केली आहे. घटनेप्रकरणी आरोपी विकेश नगराळे याच्यावर सुरवातीला कलम 307, 326(a)अन्वये गुन्हा दाखल करण्यात आला होता. पीडितेचा मृत्यू झाल्यानंतर यामध्ये 302 या कलमाची वाढ करण्यात आली आहे. प्रकरणाचा लवकर तपास करून प्रकरणात चार्जशीट दाखल करण्याचा प्रयत्न असल्याचं पोलीस अधीक्षक डॉ. बसवराज तेली यांनी सांगितलं होतं. त्याप्रमाणे प्रकरणाचा सर्व बाजुंनी तपास करत कोर्टात दोषारोपपत्र दाखल करण्यात आलंय.
नक्की काय घडलं हिंगणघाटमध्ये?
हिंगणघाटच्या श्रीमती कुणावार महिला महाविद्यालयात वनस्पतिशास्त्र विषयाची अर्धवेळ प्राध्यापक असलेली पीडिता ३ फेब्रुवारीला सकाळी आपल्या घरातून बसने हिंगणघाटला आली. आरोपी विकेश नगराळे तिच्या नेहमीच्या मार्गावर दबा धरून बसला होता. ती दिसताच त्याने दुचाकीतील पेट्रोल काढून तिच्यावर ओतले आणि जाळण्याचा प्रयत्न केला. त्यात ही तरुणी ४० टक्के होरपळली. नागपूमधील एका खासगी रुग्णालयात तिच्यावर उपचार सुरू होते. मात्र आठवडाभर मृत्यूशी झुंज दिल्यानंतर सोमवारी तिची प्राणज्योत मालवली.
